|
'O fesso d'oggi
'O fesso d'oggi non è cchiù nu fesso
com 'a chille è na vota, aperte e chiare,
sì, a sustanza cchell’è, da, dint è 'o stess
ma ‘a fora è n’ata cosa, nun ce pare.
Na vota 'o fesso s'arriconosceva,
nun mbrugliava chi era intelligente
Era fesso: 'o ssapeva e ce teneva
a farsi ariconoscere dd’a ggente.
'O fesso d'ò ppassato te spassava:
confromme tt'ò scrutavi miez'a via
nun sapivi che cosa t'aspettava
ma era sempre nu spasso 'a fesseria.
E po' ogni fesso era nu specialista,
teneva o' tipo suo, com'à n'attore
ce stava o liberale e o sucialista,
c'era l'analfabeta e o' professore.
'E fessi d'oggi songhe tutt'eguali,
seriusi, tristi, appucundruti e mosci,
fumano a pippa, portano gli occhiali
si nun ssaie o' fatto non li arriconosci.
'O fesso d'oggi è comme annasconnuto,
s'è travestito da intellettuale
tene na bibblioteca, fa 'o saputo,
penza 'a rivoluzione culturale.
Si tu non te n'accorgi d'a parlata
qquanno dice strignennose 'int'a' fronte:
"La critica di Marx è ormai datata
nella misura in cui il discorso è a monte"
Nu connutato certo 'o fesso tene
cch'è meglio che nu timbro i ceralacca;
guardalo bbuono quanno se ne vene;
vire, tene 'A Repubblica int'à sacca.
Orazio Mazzoni - Estate 1977
'A festa 'e Natale
Se tu incontri un miscredente
metti il caso un musulmano,
tuo dovere di cristiano
è cercà d'o cunvertì.
E mmò propri ch'è Natale
s'appresenta l'occasione
pe' cchi è 'e n'ata religione
chesta festa nun ce stà.
Tutt' 'e cose d' 'o Natale
l'infedele nun' 'e ssape,
ma si ll'uocchie tu l'arape
corre a se fa battezzà.
Pirciò falle bbuono 'o cunto
e de chesti devuzione
falle l'enumerazione
e accussi tu 'o può salvà.
'O Natale è 'a tredicesima:
l'haie 'a pavà se si industriale;
si t' 'a danno o sì statale
ch'è? può 'e diebbete apparà?
Miette mano 'a sacca e pave,
caccia 'a mancia p' 'o pustino,
p' 'o purtiere, p' 'o spazzino.
E' Natale? E haie 'a pavà.
Pò nce stà 'a beneficenza,
San Vincenzo, l'Hinner Willa...
N'haie 'a fà zuppe 'e cammomilla
p' 'e denare c'haie 'a caccia'.
Pò 'e regale p' 'e pariente,
p' 'o dottore, l'avvocato,
certo, 'o ssaie, t'hanno 'nguaiato,
ma 'o regalo l'haie 'a mannà.
Pò 'e bigliette pe' ll'augurie:
tu m' 'e manne e io t' 'e manno,
t'he' scurdato 'o Capodanno
e staie ancora ad augurà.
E' pasture p' 'o presebbio:
n'ata spesa e nunn'abbasta.
Sega 'ncolla, 'nchiova, 'mpasta:
ccà 'nc' 'e haie pure faticà.
Mmiez' 'o ghiaccio a Roccaraso
Sei milioni e vaie a' 'e Seichelles.
L'infedele, puveriello!,
resta a casa e prega Allah.
Ma Natale, soprattutto,
p' 'o credente è na magnata.
No nu pranzo o una jurnata:
s'accummencia d' 'a vigilia...
'A vigilia 'o pranzo è 'e magro:
tutto quanto a bbase 'e pesce.
Dal bilancio tuio nun c'esce?
Ma la legge è cchesta ccà!
Pò 'o cenone. Tutta 'a notte.
Pò Natale che è 'a jurnata
propriamente cunsacrata,
e che ffaie? nun vuò magnà?
Santo Stefano? E' di rito
cunzuma' tutti gli avanzi.
Nce ne stà pe' trenta avanzi,
e pirciò datte da fà.
Na magnata pe' tre ghiuorne,
e però pure succede
ca chi tene assaie cchiù fede
assai cchiu' sape magnà.
Ha dei dubbi l'infedele?
D' 'a menesta mmaretata
'nzino all'ultmo, 'a cassata,
tu lle spieghi ch'e' 'o menu'.
Vermicielli 'a 'e frutt' 'e mare,
'o tacchino, 'o capitone,
susamielle, panettone,
raffiuoli e roccoco'.
Tutt' 'o spirito ecumenico
ch'è 'nzerrato int 'a stu cunto
arrivate a chiustu punto
'o travolge, 'o fà abbiurà.
Ch'è? Rinuncia 'o musulmano
a sti ccose sante e care?
Ah, c'è poi un particolare,
si 'o vvuò di... nasce Gesù.
Orazio Mazzoni - Natale 1985
|
